Имрӯз, 31 августи соли 2026, дар саросари кишвар Рӯзи дониш ва Дарси сулҳ бо рӯҳияи баланди ватандӯстиву маърифатпарварӣ таҷлил гардида истодааст. Ба ин муносибат дар Коллеҷи муҳандисию омӯзгории шаҳри Душанбе тамошои дастаҷамъонаи мулоқоти Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо аҳли маорифи кишвар ташкил гардида, роҳбарият, омӯзгорону кормандон, донишҷӯёну хонандагони муассиса дар фазои тантанавӣ ва бо эҳсоси баланди масъулияту эҳтиром ин мулоқоти муҳимро пайгирӣ менамоянд.
Мулоқоти Пешвои миллат бо аҳли маориф яке аз рӯйдодҳои муҳими ҳаёти иҷтимоиву маънавии кишвар ба шумор рафта, ҳар сол дар арафаи оғози соли нави таҳсил баргузор мегардад. Дар чунин вохӯриҳои муҳим масъалаҳои мубрами соҳаи маориф, дурнамои рушди низоми таҳсилот, баланд бардоштани сифати таълиму тарбия, омода намудани кадрҳои соҳибкасб ва нақши омӯзгор дар тарбияи насли оянда мавриди таваҷҷуҳи махсус қарор мегиранд.
Пешвои миллат дар суханрониҳои худ ҳамеша ба рушди соҳаи маориф ҳамчун яке аз самтҳои афзалиятноки сиёсати давлатӣ таваҷҷуҳи хосса зоҳир менамоянд. Дастгирии пайвастаи соҳа, бунёду навсозии муассисаҳои таълимӣ, беҳтар намудани шароити таълиму тарбия, рушди илм ва технологияҳои муосир, баланд бардоштани мақоми омӯзгор ва омода намудани мутахассисони ҷавобгӯ ба талаботи замони муосир аз ҷумлаи самтҳои муҳими сиёсати маорифпарваронаи давлат ба ҳисоб мераванд.
Барои Коллеҷи муҳандисию омӯзгории шаҳри Душанбе баргузории чунин мулоқот аҳамияти хосса дорад. Зеро муассиса дар самти омода намудани мутахассисони миёнаи касбӣ фаъолият намуда, дар баробари додани донишҳои назариявӣ ба ташаккули малакаҳои касбӣ, ҷаҳонбинии илмӣ, қобилияти эҷодкорӣ, навоварӣ ва масъулияти шаҳрвандии ҷавонон таваҷҷуҳи ҷиддӣ зоҳир менамояд.
Тамошои дастаҷамъонаи мулоқоти Пешвои миллат барои омӯзгорону кормандон ва махсусан барои донишҷӯёну хонандагон аҳамияти муҳими тарбиявӣ дошта, дар онҳо ҳисси ватандӯстӣ, худшиносии миллӣ, эҳтиром ба арзишҳои миллӣ ва масъулиятшиносӣ дар назди ҷомеаву Ватанро таҳким мебахшад.
Ҷавонон — қувваи пешбарандаи ҷомеа ва созандагони ояндаи кишвар мебошанд. Аз ин рӯ, дарки арзиши дониш, илм, касбу ҳунар ва истифодаи самараноки имкониятҳои фароҳамовардаи давлат барои таҳсилу рушди шахсӣ вазифаи муҳимми ҳар як донишҷӯ ва хонанда мебошад.
Аҳли Коллеҷи муҳандисию омӯзгории шаҳри Душанбе бо эҳсоси баланди масъулият дастуру ҳидоятҳои Пешвои миллатро қабул намуда, минбаъд низ тамоми саъю талоши худро ба баланд бардоштани сифати таълиму тарбия, рушди корҳои илмӣ ва инноватсионӣ, истифодаи технологияҳои муосир, касбомӯзии ҷавонон ва омода намудани мутахассисони рақобатпазиру соҳибкасб равона хоҳад кард.
Бовар дорем, ки мулоқоти имрӯза бо аҳли маориф барои оғози соли нави таҳсил неруи тоза бахшида, омӯзгорон ва донишҷӯёну хонандагонро ба фаъолияти созанда, донишандӯзӣ, ҷустуҷӯҳои илмӣ, ихтироъкорӣ ва расидан ба дастовардҳои нав ҳидоят менамояд.
Рӯзи дониш ва Дарси сулҳ муборак бошад!
Бигзор соли нави таҳсил барои ҳар як омӯзгор, корманд, донишҷӯ ва хонандаи Коллеҷи муҳандисию омӯзгории шаҳри Душанбе соли комёбиҳои нав, дастовардҳои илмӣ, касбомӯзии босифат, эҷодкорӣ ва қадамҳои устувор ба сӯи ояндаи дурахшони Тоҷикистони соҳибистиқлол гардад!